सम्पत्ति बीमा दाबी क्यालकुलेटर

1. १

   तुरुन्तै: क्षति बढ्न नदिनुहोस् र बीमा कम्पनीलाई खबर गर्नुहोस्। फोन, SMS वा इमेल भए पुग्छ; पछि लिखित रूपमा पनि जानकारी दिनुहोस्।

   बीमा कम्पनीलाई पहिलो पटक खबर गरेको दिनलाई दाबीको मिति मानिन्छ। बीमा कम्पनीले सहयोगका लागि प्रतिनिधि पठाउँछ र दाबी फाराम तथा सबै कागजात एकैपटक माग्छ।

2. २

   आगलागी, हुलदङ्गा, आतङ्कवाद वा अपराध भएमा, वा भएको शङ्का लागेमा प्रहरीलाई खबर गर्नुहोस्।

   प्रहरी, बीमा कम्पनी र दाबीको छानबिन गर्ने अरू सबैलाई सहयोग गर्नुहोस्, र दाबीका लागि चाहिने प्रमाण जोगाएर राख्नुहोस्।

3. ३

   ७ दिनभित्र बीमा कम्पनीले बीमा सर्भेयर नियुक्त गर्छ र उहाँ को हुनुहुन्छ भनेर तपाईँलाई जानकारी दिन्छ।

   तपाईँको बीमालेखमा अर्कै कुरा लेखिएको नभए बीमा सर्भेयरले ६० कार्यदिनभित्र प्रतिवेदन दिनुपर्छ। प्रतिवेदनमा तपाईँले कति पाउनुहुन्छ भन्ने लेखिन्छ, र तपाईँलाई पनि जानकारी दिइन्छ।

4. ४

   बीमा कम्पनीलाई खबर गरेको ३५ दिनभित्र पूरा दाबी पठाउनुहोस्। बीमा कम्पनीले थप समय दिन सक्छ।

   के भयो र किन भयो; क्षति हुँदाको मूल्यमा आधारित रकम (नाफा नजोडी); बिल, नक्सा, हिसाबका खाता र बीजकजस्ता प्रमाण; र सम्पत्तिमा भएका अरू कुनै बीमा। हरेक बीमा कम्पनीले आफूलाई चाहिने कागजातको सूची आफ्नो वेबसाइट र सूचना पाटीमा राख्छ।

5. ५

   बीमा सर्भेयरको प्रतिवेदन आएको ७ दिनभित्र बीमा कम्पनीले भुक्तानी गर्छ, वा किन नगर्ने हो लिखित रूपमा जानकारी दिन्छ।

   रु. २,००,०००सम्मका दाबीलाई साना दाबी मानिन्छ र कागजात पुगेको ७ दिनभित्र भुक्तानी हुन्छ। अन्तिम रकम तय हुनुअघि नै बीमा कम्पनीले अनुमानित रकमको ५०%सम्म भुक्तानी गर्न सक्छ।

6. ६

   तपाईँ असहमत हुनुहुन्छ भने ६ महिनाभित्र नेपाल बीमा प्राधिकरणमा उजुरी गर्नुहोस्। प्राधिकरणको निर्णयमा पनि असहमत हुनुहुन्छ भने ३५ दिनभित्र उच्च अदालतमा पुनरावेदन गर्नुहोस्।

   अस्वीकृत दाबीबारे ६ महिनाभित्र प्राधिकरणमा उजुरी नगरेमा त्यो दाबी फेरि गर्न पाइँदैन।

स्रोत: घर र सम्पत्ति बीमालेखको पाठ, बुँदा 12, 19, 26–27, र बीमितको दायित्व (घर बुँदा 23, सम्पत्ति बुँदा 22); बीमा नियमावली, २०८१, नियम 52, 88, 89, 91; नेपाल बीमा प्राधिकरणको बीमा दाबी भुक्तानी मार्गदर्शन, २०८१, दफा 4, 8–10